الثلاثاء، 19 مايو، 2015

يعنى أيه سوشال ميديا و أيه علاقتها بالتسويق ؟؟

 
سوشال ميديا - Social Media


أول حاجة يعنى أيه سوشال ميديا و أيه علاقتها بالتسويق ؟؟


السوشال ميديا أو الأعلام الأجتماعى يعتمد على نشر كل ما هو جديد فى سياق أجتماعى حسب دائرة معارف كلا منا


و بيعد الأعلام الأجتماعى الأن هو أهم وسائل نشر أى معلومه أو خبر بسبب السهولة و السرعة فى الأنتشار

ده بياخدنا لجزئية تاينة سريعا و هى " شبكات التواصل الأجتماعى " و إللى هى
منها الفيس بوك و تويتر و يوتيوب و جوجل بلس و بنترست و غيرهم كتير



و دى  مواقع بتقوم بتسهيل الأتصال بين الناس سواء عن طريق الكتابه أو الصوت أو الصورة أو الفيديو أو أيا كانت طريقة التواصل

لأن مواقع التواصل الأجتماعى بتختلف حسب نوعها لأن منها إللى بيعتمد  على الصور أو النصوص أو الفيديو أو كل ده زى الفيس بوك مثلا

-----------------

طيب ده الجزء النظرى أو زى ما بيبقى مكتوب فى الكتب .... نفهم بقى أحنا أيه من ده ؟؟

نفهم أن الاعلام الأجتماعى هو وسيلة لنشر كل ما هو جديد عن طريق الأنترنت و ده طبعا بسبب التطور التكنولوجى إللى بيحصل كل يوم

و مواقع التواصل الأجتماعى دلوقتى بقت بتستخدم كمنصات لنشر الأخبار و القصص و أى حدث يحدث فى أى مكان فى العالم و ده لأن كل حدث له محبيه و متابعيه طبعا


طيب يعنى المواقع دى أتعملت علشان نتواصل مع بعض أيه علاقتها بالتسويق بقى ؟؟؟


فى حاجة مهمة أوى لازم نعرفها و أنا شخصيا بشتغل بالمبدأ ده و هو أن " التسويق ده عامل زى لعبة الكوتشينة بيبقى معاك 4 ورقات بتلعب بيهم و أنت و شطارتك بقى يا تلم الورق كله و تكسب يا أما تخسر إللى معاك "  و السوشال ميديا و مواقع التواصل الأجتماعى تعتبر أداه جبارة بتسهل من  عملية وصولك للعميل بتاعك بسهولة و سرعة جبارة ...


بس برضه أيه علاقة ده بالتسويق ؟؟؟


أنا هقولك .... تخيل كده لو أنا و أنت أصحاب و بنتكلم مع بعض فى أى حاجة و بعد فترة لقيتك أنك عايز تشترى هدوم و أنت عارف أنى عندى محل هدوم
ساعتها هكون أول حد هتفكر فيه أنك تشترى من عنده ... و ده لأننا أصحاب و أنى واخد جزء من تفكيرك ... دلوقتى الشركات بقت بتستغل مواقع التواصل الأجتماعى أنها تفضل قريبة من عملائها لأن زى ما بيقولوا " البعيد عن العين بعيد عن القلب "



هكسب أيه أنا كشركة لو مش بتواصل مع العملاء بتوعى و مش بعرف هما بيبقوا عايزين أيه ؟؟

فى الواقع كشركة مش هتكسب حاجة بل و بالعكس هتخسر كمان لأنك ساعتها هتكون بتخسر حاجة بتسمى فى التسويق Opportunity Loss   يعنى فرصة ضايعة أنك تكسب 


و علشان كده الشركات و البراندات الكبيرة بقت بتستخدم مواقع التواصل الأجتماعى أنها تتواصل أكتر مع الناس و تعرف الناس عايزة أيه 
و بناء على ده هتقدر توفر المنتجات و الخدمات المناسبة للعملاء المناسبين فى الوقت المناسب و بالطريقة المناسبة بشكل يساعد الشركة أنها تحقق الربح إللى هى عايزاه 




---------------------------------------------------

هستنى رأيك فى الكلام ده و لو فى حاجة مش واضحة ياريت تقولى عليها علشان نوضحها بشكل أحسن 
و تقدر توصل لباقى سلسة المواضيع عن طريق الموضوع ده  




و طبعا هتبقى فعال أكتر لو أتفاعلت معايا على الهاش تاج ده 

#أزاى_تبقى_بتاع_سوشال_ميديا  

#بتاع_سوشال_ميديا 


#SocialMedia_MohamedGomaa