الثلاثاء، 2 يونيو، 2015

السوشيال ميديا لغير المتخصصين - صراع بين المعلنين و المستهلكين

السوشال ميديا لغير المتخصصين
السوشيال ميديا لغير المتخصصين - صراع بين المعلنين و المستهلكين  
 
Social Media - سوشيال ميديا
Social Media - سوشيال ميديا
التسويق مش للمسوقين بس .. ده كمان للمستهلك كمان !!!!
علم التسويق و منشقاته من تسويق رقمى ثم تسويق عن طريق مواقع التواصل الأجتماعى ( السوشيال ميديا ) اصبح هاجس فى ذهن الكثير من الشركات و المؤسسات و ده للكثير من الأسباب اهمها السعر و السرعة و السهولة

بس أغلبية المقالات أو الكتب بتناقش التسويق عن طريق مواقع التواصل الاجتماعى ( السوشيال ميديا ) من وجهة نظر الشركات و المسوقين بس



بنتغاضى عن توعية المستخدم العادى عن كيفية استخدام المواقع و مواقع التواصل الأجتماعى بشكل سليم على الرغم أنه لو فهم كويس أنه لما بيضغط على زرار " LIKE " لأى صفحة ده المفروض لما بيكون فعلا مهتم بالحاجة دى علشان يوصله الحاجة إللى تناسبه و يعمل عملية  Filtration  للرسائل الأعلانية إللى بقت بتظهر بكمية جبارة كل دقيقة
كنا عرضنا قبل كده سلسلة مواضيع تحت مسمى " أزاى تبقى بتاع سوشال ميديا  "
و تقدر تحمل الكتاب الخاص بالسلسلة دى من هنا .... بس برضه دى كانت مخصصة للمتخصصين فقط

علشان كده فى الموضوع ده هشارك معاك أنت ... المستخدم الطبيعى إللى مش شغال فى التسويق أو مش بتاع سوشال ميديا هشارك معاك نصائح سريعة و مهمة جدا عن كيفية أستخدام الأنترنت و مواقع التواصل الأجتماعى بطريقة صحيحة هتفيدك كتير و عمرها ما هتكون بالنسبة لك مجرد Spam بل بالعكس هتكون فعلا مصدر تواصل و معرفة و مواكبة لكل جديد




-  لما تعمل Like لأى صفحة لازم تبقى عارف أنك بالطريقة دى بتقول للشركة دى أنك مهتم بيهم و بتحب المنتج بتاعهم و على أساس تصرفك ده هما كشركة المفروض بتتصرف ... فلو أنت مش مهتم بيهم و عملت Like كده و خلاص كده أنت هتضر الشركة و انت كمان هتضر ... و هقولك هتضر ازاى فى النقطة إللى جايه .

- ال Like بتاعك لأى صفحة بيتصنف أنه interest يعنى أهتمام فممكن تكون أنت راجل ماعنكدش عربية ولا بتحب العربيات ولا حتى ناوى تجيب عربية بس على الرغم من ده عامل Like لصفحات عربيات كتير , ده بيتصنف أن أهتمامتك فيها جزء خاص بالعربيات و على أساس أهتمامك ده بيتحدد نوعية الأعلانات إللى بتظهرلك بعد كده ... فأنت ممكن تزهق من الأعلانات إللى من نوعية " أشترى عربيتك الان بخصم 10% " بس أنت إللى سمحت بده


- لما بتعمل Like أو comment على أى بوست بتاع أى بيج , برضه أنت بتقول أنك مهتم بالحاجة دى و على اساس كده هيظهرلك على ال News Feeds بتاعك حاجات شبه إللى أنت عملتله Like

و علشان نفصل أكتر فى خطورة ال Like

أحترس " الايك " فيه سم قاتل !!!!

Like Button
Like Button

مع الأنفجار الرهيب فى موضة مواقع التواصل الأجتماعى و أشهرها الفيسبوك و تويتر و بعد كده فى بينترست و جوجل بلس و غيرهم مواقع كتير .

بنلاقى دايما أن فى بعض السمات المشتركه بين المواقع دى و و طبعا من أهم الحاجات دى سهولة مشاركة أى حاجة مع أصحابك و فى نفس الوقت سهولة أستقبال رد فعلهم على الحاجة دى

زى مثلا كده لما بتتصور صورة و تنشرها على الفيسبوك و يدخل أصحابك منهم إللى يجاملك و منهم إللى يتريق و هكذا ......
:
بس فى زرار خطير فى الفيسبوك و هو " الايك Like " و بيختلف أسمه من موقع لأخر يعنى مثلا فى تويتر أسمه " Favorite " و فى بينترست Pinterest مثلا أسمه " Pin "
عامة فى الأخر مهما أختلفت المسميات بس الزرار ده بيمثل رد فعل

طبعا أنك مثلا تعمل " لايك " على موضوع أو بوست أى حد كاتبه , ده بيمثل رد فعل منك تجاه إللى منشور ده

و خلى بالك أن رد الفعل ده بيتاخد على اساسه قرارات من الجانب الأخر

فمثلا واحد صاحبك أتصور بتيشيرت ( بس التيشيرت ده مش حلو شويتين و كمان شكل صاحبك ما كانش إللى هو يعنى ) بس أنت علشان تجامل صاحبك و تحسسه بنفسه عملت لايك

و لعلمك فى ناس مش بتعمل لايك على حاجة إلا لما بتلاقى غيرها عمل لايك ( جزء نفسى شوية ) يعنى أنت هتخلى ناس تانية تعمل لايك على حاجة مش حلوه أوى و صاحبك بناء على ده ممكن أوى ياخد قرار أن كان شكله مظبوط و التيشيرت كان جامد جدا , من الأخر وديت صاحبك فى داهية


بس فى الحقيقة الموضوع أكبر من كده شويتين تلاته و لازم يبقى عندنا وعى شوية أحنا أزاى بنتعامل مع مواقع التواصل الأجتماعى سواء كنا بنستخدمها فى شغلنا أو أستخدام عادى (إللى هو الأستخدام الطبيعى إللى هى أتعملت ليه أصلا و هو التواصل بين الناس )

برضه لما بتعمل لايك لأى بيج المفروض يبقى عندك وعى و بتعمل لايك للحاجة إللى أنت فعلا بتحبها أو مهتم بيها
لأن ده بيعتبر تصريح منك أنك مهتم بالحاجة دى و إللى شغال على الحاجة دى بيقيس شغله عليك فأنت كده بتحط نفسك فى مكانه غلط و بتضر غيرك

ضرر زرار " اللايك " واسع و مش سهل و لازم نستخدمه بهدوء شوية ... مش ماكينة لايك و أى حاجة نشوفها نعمل عليها لايك و خلاص .... و ماتنساش أن عندك وسائل تانية تعبر بيها عن أعجابك بأى حاجة متمثلة فى " تعليق " أو أنك حتى تعمل شير للحاجة دى




-----------------------------------------------------
Internet Users - Marketing
Internet Users - Marketing

طيب ده بخصوص السوشال ميديا و التفاعل على السوشال ميديا
طيب بالنسبة للمواقع التانية ... فى جزء و هجوم على الأدوات إللى بتقفل الأعلانت و بتلغى ظهورها على المواقع و فى موضوع رائع على مجلة أمناى هيفدكم كتير " نجاح ال AdBlock "


تعرف انك لما بتدخل على أى موقع و ترجع تدخل على أى موقع من مواقع التواصل الأجتماعى ان الموقعين عارفين ده و على اساس ده بيظهرلك أعلانات من نفس نوعية المواقع إللى أنت بتزورها


أنت المفروض خلاص بقيت عارف تميز بين الأعلان أو الصورة العادية سواء على الموقع العادى أو مواقع التواصل الأجتماعى ... و على الأساس ده المفروض تبقى عارف أنك لما بتدوس على الاعلان ده أنت كده بتقول للمعلن بطريقة مباشرة جدا " يوجد شخص مهتم بما تقدمه من خدمات أو منتجات "

تخيل معايا كده أن فى مطعم بيقدم نوع أكل جديد و غريب و عمل أعلانات فى كل حته ... و أنت كل لما تشوف الأعلان بتاعه بتدوس عليه أو بتعمله Like كده أنت بتقوله " أنت كويس كمل الأكل بتاعك حلو " على الرغم أن الحقيقة ممكن تكون عكس كده خالص و فى نفس الوقت أنت بتكلفة فلوس مقابل ده


 -----------------------------------------------------


كنا لازم نناقش مع بعض الجزء ده و تقدر أنت لو متخصص فى السوشال ميديا  أنك تشارك الموضوع ده مع أصحابك  الغير متخصصين علشان تساعدهم يتعاملوا مع الأنترنت و مواقع التواصل الأجتماعى بشكل أفضل ليهم و ليك كواحد " بتاع سوشال ميديا


طبعا هستنى رأيكم فى الموضوع ده سواء كنت متخصص فى السوشال ميديا أو غير متخصص 
مدونتى دايما هتكون موجودة معاك  


 لأن أى رد فعل هتعمله على الموضوع ده هيكون ليه معنى طبعا و هيكون تطبيق لكل إللى أتكلمنا عليه 

شكرا لوقتكم :)