السبت، 11 يوليو، 2015

12 كدبة عن العمل من المنزل و الربح السريع من الأنترنت

 12كدبة عن العمل من المنزل و الربح السريع من الأنترنت

 
 العمل من المنزل و الربح السريع من الأنترنت
 العمل من المنزل و الربح السريع من الأنترنت
العمل من المنزل , الربح من الأنترنت , الربح السريع من الأنترنت ... كل دى جمل منتشره جدا على الأنترنت و ناس كتير بتسأل عليها و أتكتب فيهم مقالات و أتعمل عليهم كورسات و أتقال فيهم طرق و أسرار كتييييير جدا ... بس المشترك بنهم أن برضه أتقال كلام كتير مش صح ... و كلام مبهم بيضلل ناس كتير بالذات إللى لسه بيبدأ شغله على الأنترنت , و فى الموضوع ده هناقش معاكم 12 كدبة بتتقال عن العمل من المنزل .. مش دول بس الكلام الغلط إللى بيتقال فى المجال ده .. بس ممكن يكونوا دول أشهر الجمل الغلط .


كدبة رقم 1 : " ممكن تشتغل من البيت من غير تعب "
أول كدبة هو أن حد يفهمك أن فى أمكانية أنك تشتغل من البيت و بدون مجهود, العمل من المنزل ممكن جدا و ده شئ لا جدال فيه , بس أنك تحقق أرباح كتير من غير مجهود ... ده شئ مرفوض تماما و صعب جدا يحصل إلا بعد مرحلة معينة

أى شغل على الأنترنت بيحتاج مجهود و أستمرارية و صعب تبان أى نتيجة مش قبل شهر على الأقل ده لو أنت بتشتغل كل يوم و طبقا لأستراتجيات و خطط محترمة


كدبة رقم 2 : " ربح سريع و كتير على الأنترنت "

ربح الأنترنت مش سريع خالص ... خالص ... خالص .... لأنه زى ما قولنا فوق الشغل على الأنترنت بيحتاج مجهود و تخطيط و أستمرارية و طبيعى أن العائد بتاع الشغل ده أكيد مش هيحصل بسرعة

يعنى مثلا لو أنت شغال على أى مجال من مجالات الربح أو العمل أون لاين و عايز تحقق أرباح هتحتاج يبقى عندك زوار و ناس مستهدفة صح و ده مش بيحصل بسرعة أو بالعدد المطلوب
و بياخد وقت يبقى بالطبيعى الربح برضه مش هيجى بسرعة


  
كدبة رقم 3 : " تقدر تشتغل أون لاين بدون خبرة "
لو أنت خريج هندسة و تقدر تشتغل محامى يبقى تقدر تشتغل أونلاين بدون خبرة .

أيا كان مجال الربح أونلاين إللى أنت أختارت تشتغل فيه هتحتاج خبرة و فى أكثر من جزئية علشان تقدر تحقق نتائج كويسة
مثلا هتحتاج يكون عندك فكرة كويسة عن السيو علشان تقدر تهيئ الموقع بتاعك لمحركات البحث و تكسب زوار مستهدفين , هتحتاج يكون عندك القدرة أنك تكتب محتوى بأشكال مختلفة سواء مقالات أو صور أو فيديو علشان يناسب الزوار و يحقق أهدافك
لازم تكون بتعرف تستخدم مواقع التواصل الأجتماعى بالطريقة إللى تناسب شغلك , لازم مثلا تعرف أزاى تعمل باك لينكس قوية توصل موقعك لناس أكتر .... كل ده و حاجات تانية هتساعدك تربح أكثر و على قد ما هتعرف أكتر و تطبق ده على قد ما هتزود أرباحك أونلاين

كدبة رقم 4 : " أنقل أى موضوع و عدل عليه "
بمجرد أنك تفكر تنقل أى موضوع أو أى محتوى و تعدل عليه علشان تكسب منه أعرف أنك ماشى غلط
جوجل دلوقتى بقى ذكى جدا و بقى يعرف يفرق بين الموضوع الحصرى , إللى مش منقول , إللى مش متعدل عليه , و بين أى موضوع تانى منقول أو مسروق

و ده حفاظا على حقوق الملكية للناس إللى بتتعب و بتعمل محتوى يفيد الناس
تقدر طبعا تترجم مقالات و مواضيع أجنبية و تعرضها بطرقة كويسة بس أهم حاجة ما تكونش متكررة أو منقولة



كدبة رقم 5 : " أنت مش محتاج تكون بتعرف أنجليزى علشان تشتغل أون لاين "
أى حد يقولك مش هتحتاج تعرف أنجليزى و ـنت شغال أونلاين يبقى أكيد بيضحك عليك ... و ده لأن حتى الأن صعب تلاقى موقع عربى يعتبر مصدر للمعلومة ... و ده بيتأكد من نسبة المحتوى العربى على الأنترنت
إيه لازمة الأنجليزى و أنت أصلا هتعمل بيزنس أو موقع بيستهدف العرب و كل إللى هتكتبه هيكون بالعربى ؟؟
هنا بقى بتكون المشكلة الكبرى لما تفتكر أن المحتوى العربى أصلا ليه قيمة على الأنترنت , المحتوى العربى على الأنترنت قليل جدا جدا جدا ... علشان كده كلنا بنسعى لتطويره وكل واحد و مجهوده و طريقته و بينتج على ده أن المحتوى الأجنبى بيكون هو المصدر للمعلومة , يعنى لو عايز تتعلم حاجة أو تعرف تحديث جديد على محكرات البحث أو السوشيال ميديا ... لازم تلجأ للمصدر الأجنبى
و ده لو أنت مش شغال أصلا على موقع و المحتوى بتاعة بالأنجليزى
يبقى مين بقى إللى قال أنك مش محتاج تكون بتعرف أنجليزى ؟؟
إيه لازمة الأنجليزى و أنت أصلا هتعمل بيزنس أو موقع بيستهدف العرب و كل إللى هتكتبه هيكون بالعربى ؟؟
هتحتاج تكون بتعرف تقرأ و تفهم الأنجليزى بدرجة كويسة مش شرط تكون محترف أو بتتكلم بطلاقة بس مهم تكون بتفهم إللى بتقرأة علشان هو ده إللى هتستمد منه معلوماتك و خبراتك


كدبة رقم 6 : " شغل السبام Spam  هو الحل  "
أنك تشتغل بطرق غير شرعية سواء فى عدد الزوار لموقعك أو عدد الفانز فى الفيسبوك أو عدد المتابعين على تويتر ده مش كويس خالص
لأن ده ليه سببين مهمين جدا جدا
-         لو أشتغلت بطريقة سبام على موقعك ساعتها جوجل هيفهم ده و موقعك مش هيظهر فى محرك البحث و مش هيوصل للناس و مش هتحقق أى أرباح و أوعى تتجاهل جوجل خالص و ده لأن 54% من الناس يستخدمون موقع جوجل للبحث، و 46% يستخدمونه للتأكد من أن اتصال الأنترنت يعمل بشكل سليم
-         أى عدد غير مستهدف أو وصل ليك عن طريق السبام مش هيحققلك أى أرباح لأنهم ناس غير مستهدفين يعنى مش هيقوموا بأى نشاط يعود علي بالربح


كدبة رقم 7 : " السوشيال ميديا مش مهمه أهم حاجة تكون مظبط السيو بتاع موقعك  "

بأختصار شديد إللى يبدأ أى بيزنس أونلاين و يعتمد على السيو بس من غير السوشيال ميديا زى إللى عايز يجرى بسرعة و رجله مكسوره ... هيجرى برجل واحدة أزاى ؟؟
السوشيال ميديا هى عامل مهم جدا فى بناء علاقة بينك و بين عملائك و بتساعدك تعرض المحتوى بتاعك أو خدماتك بشكل مختلف و بتفرق كتير فى نسب زوار موقعك أو نسب مبيعاتك
السيو و السوشيال ميديا سلاحين من أهم اسلحة الأونلاين بيزنس لازم تهتم بيهم كويس جدا
و تقدر تشوف الكورس المجانى ده لو أنت لسه مبتدئ فى السوشيال ميديا 


 أو تقدر تحمل الكتاب الخاص بالكورس من هنا تحميل كتاب : كورس للمبتدئين - أزاى تبقى بتاع سوشال ميديا


كدبة رقم 8 : " أربح بمجرد مشاهدة الأعلانات  "
هتلاقي كتير جدا مواضيع و مواقع هتقول أنك ممكن تربح فلوس كتير بمجرد أنك تشاهد أعلانات يومية و كل أعلان هتاخد عليه فلوس معينة و يقولك أنك تقدر تعمل مبلغ معين يوميا بدون تعب
ده طبعا غلط و مش صح تماما و ده ليه سببين
اول سبب أن لو فكرت تدور على حقيقة أى موقع من المواقع دى و هل فعلا بيسلم فلوس للناس فعلا ولا لأ .. هتلاقى أنه بيكون نصب
و السبب الثانى .. جربت تسأل نفسك مره هو ليه مش هتلاقى شركات كبيره بتعلن فى المواقع دى .... أقولك أنا , أى أعلان بالطريقة دى مش بيحقق أى نتيجة سواء بيع أو اشهار للمنتج أو أى شئ


ربح سريع على الأنترنت
ربح سريع على الأنترنت 


كدبة رقم9: "  غرق موقعك أعلانات  "

الربح مش بيكون بعدد الأعلانات فى الموقع و ده لأن الزائر الطبيعى لموقعك بمجرد أنه هيلاقى أعلانات كتير فى الموقع مش هيرجعلك تانى و هيعرف أنك عايز تستغله بأى شكل و ساعتها مش هيشترى عن طريقك لو أنت شغال Affiliate  أو حتى يدوس على الأعلان لو أنت شغال Adsense   مثلا
بجانب أن جوجل مع مرور الوقت هيعرف أنك موقعك مش بيقدم قيمة أو أى مساعدة للناس و ساعتها مش هيهتم بأى محتوى أنت بتنشره و ممكن جدا تصحى من النوم فجأة تلاقى الموقع أتقفل لأى سبب من الاسباب الغلط إللى أنت بتعملها


كدبة رقم10 : "   أشترى زوار و باك لينكس كتير  "

هنشرح الكدبة دى بمثال علشان تكون واضحة أكتر
تخيل معايا كده محل موبايلات و بمجرد الناس لما تدخل المحل تلاقيه بتاع مخلل ... أيه إللى هيحصل ؟؟؟
هو ده إللى بيحصل لما بتشترى زوار أو باك لينكس و تعتمد على العدد و بس
كنا قلنا فوق فى الكدبة رقم 6 أن شغل ال Spam  مضر جدا لموقعك و برضه عدد زوار كبير غير مستهدفين  لموقعك هيعلى عندك ال bounce rate  و ساعتها جوجل برضه هياخد باله أن زوار موقعك مش بيعجبهم موقعك أو المحتوى إللى بتنشره يبقى ساعتها أستحمل إللى ممكن يحصل لموقعك و النتائج الغير مرضية إللى هتواجهها



كدبة رقم11 : "   أتعلم أى حاجة و أشتغل freelancer  "
أنك علشان تشتغل  freelancer   أو تشتغل شغل حر على الأنترنت ده قرار كويس جدا جدا
بس علشان تاخد الخطوة دى لازم يكون عندك قدر معين من المهارات علشان لما تبدأ تبقى عارف تقدم خدمة مش موجودة كتير بجودة محترمة علشان تقدر تكسب عملاء كتير
العمل الحر على الأنترنت مليان تحديات كتير و أهم خطوتين فيه لأنك تقدر مهاراتك صح و أنك تفضل تتعلم و تطور من نفسك بأستمرار

الربح من اليوتيوب
الربح من اليوتيوب

كدبة رقم 12 : " نزل فيديوهات من و أرفعها على اليوتيوب و سجل فى أدسنس  و أعمل فلوس كتير  "

أنك تاخد قرار أنك تنقل فيديوهات من اليوتيوب و تعيد نشرها مرة أخرى أعرف ساعتها أنك أخدت القرار الخطأ
اليوتيوب هو جوجل و جوجل هو اليوتيوب و الانترنت عامة بقى بيهتم جدا بحقوق النشر
يعنى مش علشان فيديو حقق ملايين المشاهدات أنت كمان تقدر تحقق ده بنفس الفيديو ... و بمجرد أنك تنشر فيديوهات منقوله ممكن جدا حساب الأدسنس بتاعك يتقفل و تخسر أى أرباح موجوده فيه




فى الختام أحب أكد بس أن العمل من المنزل أو الربح من الأنترنت مش أسطورة أو خرافات .. بس لازم يتم بشكل مظبوط علشان ما تضيعش وقتك وسط أوهام و أحلام الملايين إللى هتنزل عليك من السماء 



اتمنى يكون الموضوع كان مفيد و هستنى أرائكم فى أى وقت :)